გორანა საგარეჯოს მუნიციპალიტეტის სოფელია და კოჭბაანის თემში შედის. სოფელში ფშავები და ხევსურები ცხოვრობენ. ადგილობრივების თქმით, ბოლო 10 წლის განმავლობაში სოფელი მოსახლეობისგან დაიცალა. გორანაში ამ დროისთვის 60-მდე ადამიანი ცხოვრობს, ძირითადად მოხუცები. სოფელი რაიონული ცენტრიდან 50 კილომეტრით არის დაშორებული. სოფელში არ არის სასმელი წყალი, ბუნებრივი აირი, ამბულატორია, საბავშვო ბაღი, სკოლა. ბავშვები სასწავლებლად სოფელ კოჭბაანის სკოლაში დადიან, რომელიც გორანადან 7 კილომეტრით არის დაშორებული.

„სკოლა დიდი ხნის წინ გაუქმდა და მას შემდეგ ყველა წავიდა. ბავშვები ვინც სოფელში ამ დრომდე დარჩნენ, კოჭბაანში ძლივს დადიან. აქ ცხოვრება ძალიან ძნელია. ზამთარში მხოლოდ ორხიდიანი მანქანები ამოდიან. ნოემბრიდან მარტის ჩათვლით, სანამ თოვლი არ დადნება, გარესამყაროს ვართ ხოლმე მოწყვეტილები. თან არც მობილური იჭერს აქ და ტელევიზორიც არ აჩვენებს, თუ სატელიტური ანტენა არ გაქვს“, - გვითხრა მარეხ გიგაურმა.

ადგილობრივები თავს პენსიით და ტყეში მოკრეფილი ხილის და სოკოს რეალიზაციით ირჩენენ.