გეოლოგიური საშიშროებისა და გეოლოგიური გარემოს მართვის დეპარტამენტის სპეციალისტებმა კახეთში გეოლოგიური კვლევები დაასრულეს. კვლევის მიზანი რეგიონში ღვარცოფული პროცესებისგან დაცვის და მართვის პროგრამის შემუშავება იყო. პროგრამა ღვარცოფული მდინარეებისა და ხევების კალაპოტებიდან ქვიშა-ხრეშის ამოღებით საშიშროების რისკის შემცირებას ითვალისწინებს.

„კახეთის რეგიონში ვიზუალურად შეფასებულ ღვარცოფულ მდინარეებში გეოდინამიკური პირობების მდგომარეობის შეფასების შედეგად დადგენილ იქნა, რომ კახეთის მდინარეთა კალაპოტებიდან ღვარცოფული ნატანის ამოღება მნიშვნელოვნად გააჯანსაღებს არსებულ გეოდინამიკურ პირობებს. ამასთან, საგრძნობლად შეამცირებს ადგილობრივი მოსახლეობის და რეგიონის ინფრასტრუქტურის ღვარცოფული ნაკადებით უარყოფითი ზემოქმედების რისკ-ფაქტორებს“, - განუცხადა კახეთის საინფორმაციო ცენტრს გეოლოგიური საშიშროებისა და გეოლოგიური გარემოს მართვის დეპარტამენტის ხელმძღვანელმა ემილ წერეთელმა.