თელავში, სასტუმრო „ძველ თელავში“ პროგრამის „ბუნებრივი რესურსების ინტეგრირებული მართვა საქართველოს წყალშემკრებ აუზებში“ პრეზენტაცია გაიმართა. პრეზენტაციას აშშ-ს ელჩი ჯონ ბასი, სამინისტროების, ადგილობრივი ხელისუფლების, დონორი ორგანიზაციებისა და  ადგილობრივი თემების წარმომადგენლები ესწრებოდნენ.

პროგრამა USAID-ის მიერ 6 მილიონი აშშ დოლარით არის დაფინანსებული. მისი მიზანია საქართველოს მოსახლეობის კეთილდღეობის გაუმჯობესება ბუნებრივი რესურსების, მათ შორის წყლის, მიწის, მცენარეული საფარისა და ეკოსისტემების გამოყენებისა და მართვის გზით.

როგორც კახეთის საინფორმაციო ცენტრს თელავის მუნიციპალიტეტის გამგებელმა პეტრე კიკნაძემ განუცხადა, პროექტი კახეთში სამ რაიონში, თელავში, ახმეტასა და დედოფლისწყაროში განხორციელდება.

„მდინარე ალაზანი ახმეტიდან დედოფლისწყარომდე გაედინება, ასევე მდინარე იორი, რომლის აუზის შესწავლაც ხდება. პროექტის ფარგლებში მოხდება წყლის ხარისხის, მართვის, რესურსების შესწავლა, მდინარის აუზებზე ინფორმაციის შეგროვება. ასევე მოწესრიგდება საირიგაციო სისტემები, რომლებიც აღარ ვარგა“, -აღნიშნა პეტრე კიკნაძემ.

როგორც პრეზენტაციაზე აღინიშნა, პროექტის პირველ ეტაპზე დაგეგმილია ალაზნის, ივრის და რიონის აუზზე ინფორმაციის შეგროვება, მის საფუძველზე ოთხი საპილოტე აუზის შერჩევა და ამ ტერიტორიებზე დეტალური კვლევების ჩატარება. ასევე, ეროზიის, მეწყერისა და წყალდიდობის თავიდან ასაცილებლად პრევენციული ღონისძიებების გატარება.

„ძალიან მნიშვნელოვანია, რომ ეს პროექტი კახეთში ხორციელდება, სადაც წყლის საკითხი უფრო მეტ აქტუალობას იძენს. გარემოს დაცვის სამინისტრო პარტნიორ ორგანიზაციებთან ერთად მთელი წლის განმავლობაში მუშაობდა კონცეფციაზე, რომლის პრეზენტაციაც დღეს მოხდა. იმედი გვაქვს, რომ პროექტი წარმატებული იქნება,“ - განაცხადა გარემოს დაცვის მინისტრის მოადგილემ გიორგი ზედგინიძემ.

4 წლიანი პროგრამის განხორციელება 2010 წლის სექტემბერში დაიწყო. პროექტი „გლობალური წყლები მდგრადობისთვის“ ქოლგა პროგრამის ფარგლებში საერთაშორისო და ადგილობრივი ორგანიზაციებისგან შემდგარი კონსორციუმის მიერ ხორციელდება, რომლის წამყვანი ორგანიზაცია ფლორიდის უნივერსიტეტია.

პროგრამის პარტნიორები არიან იუნესკოს ჰიდროლოგიური განათლების ინსტიტუტი, ქეა საერთაშორისო, ვინროკ ინტერნეიშენალი და კავკასიის გარემოსდაცვითი არასამთავრობო ორგანიზაციების ქსელი CENN.