ყვარლის რაიონში, სოფელ გრძელჭალიდან რამდენიმე კილომეტრში ტყე იწვის. როგორც კახეთის საინფორმაციო ცენტრის კორესპონდენტი იტყობინება შემთხვევის ადგილიდან, სახანძრო - სამაშველო სამსახურის მონაცემებით, ცეცხლი დაახლოებით 8 ჰექტარზეა გავრცელებული.

ხანძარი დაახლოებით 17:00 საათისთვის გაჩნდა. გრძელჭალასთან მობილიზებულები იყვნენ ყვარლის სახანძრო - სამაშველო სამსახურის თანამშრომლები ხანძარსაწინააღმდეგო მანქანებით, თუმცა ადგილი, სადაც ხანძარია, მიუვალია და წყალი ვერ გამოიყენეს.

მაშველები ვარაუდობენ, რომ დილით, ცეცხლის ჩასაქრობად, შესაძლოა, ვერტმფრენების გამოძახება გახდეს საჭირო.

შეგახსენებთ, რომ ბოლო რამდენიმე დღეა კახეთში ხანძრის შემთხვევები გახშირდა. 1-ელი იანვრიდან 18 იანვრის ჩათვლით, რეგიონში ხანძრის 150-ზე მეტი შემთხვევა დაფიქსირდა. დაიწვა ვენახები და ატმის ბაღებიც.