2010 წლის ერთიან ეროვნულ გამოცდებში 10 ათასზე მეტმა აბიტურიენტმა მინიმალური კომპეტენციის ზღვარი ვერ გადალახა. როგორც გამოცდების ეროვნული ცენტრის ხელმძღვანელმა მაია მიმინოშვილმა განაცხადა, წელს სტუდენტი 23 ათასამდე აბიტურიენტი გახდა, უმაღლეს სასწავლებლებში 11 ათასზე მეტი ვაკანტური ადგილი დარჩა, სადაც პირველადი განაცხადის შედეგად ვერც ერთი აბიტურიენტი ვერ მოხვდა.

აბიტურიენტებს, რომლებმაც მინიმალური კომპეტენციის ზვარი გადალახეს, 25 აგვისტოდან შეუძლიათ დაიწყონ მეორადი განაცხადების გაკეთება. ვაკანტურ ადგილებზე განაცხადების შეტანა 2200-მდე აბიტურიენტს შეეძლება. ვაკანტურ ადგილებზე მეორადი განაცხადების მიღება 26 აგვისტოდან 30 აგვისტოს ჩათვლით იწარმოებს.

იმ 10 ათასზე მეტ აბიტურიენტს კი, რომელმაც 2010 წლის ერთიან ეროვნულ გამოცდებში მინიმალური კომპეტენციის ზღვარი ვერ გადალახა, უმაღლეს პროფესიულ პროგრამებზე განაცხადის გაკეთების უფლებაც არ ექნება.

რაც შეეხება სააპელაციო კომისიას, რომელსაც წელს განათლების მინისტრის მოადგილე კოკა სეფერთელაძე ხელმძღვანელობდა, მას საგამოცდო ნამუშევრების გადახედვის მოთხოვნით 2574 აბიტურიენტმა მიმართა. მათგან შედეგები არ შეცვლია 1711 (ანუ 66,47 პროცენტს) განმცხადებელს. ქულები მოემატა 712 (27,66 პროცენტი) აბიტურიენტს.