გამოცდების ეროვნულმა ცენტრმა სახელმწიფო სასწავლო გრანტის გაცემის წესი გამოაქვეყნა. ერთიანი ეროვნული გამოცდების საფუძველზე სახელმწიფო სასწავლო გრანტის მოპოვების უფლება აქვს საქართველოს მოქალაქეს.

ცენტრის ცნობით, სახელმწიფო სასწავლო გრანტი, გარდა პროფესიული საგანმანათლებლო პროგრამისა, არ გაიცემა იმ პირებზე, რომლებიც არააკრედიტებულ პროგრამებზე ჩაირიცხებიან; იმ პირებზე, რომლებსაც სახელმწიფო სასწავლო გრანტი ერთხელ მიღებული აქვთ ბაკალავრიატის, დიპლომირებული მედიკოსის/სტომატოლოგის (ქართულ ენაში მომზადების საგანმანათლებლო პროგრამაზე; იმ პირებზე, რომლებმაც დააგროვეს სახელმწიფო სასწავლო გრანტის მოპოვებისათვის საკმარისი ქულა, მაგრამ ვერ მოიპოვეს 2012 წელს უმაღლეს სასწავლებელში სწავლის უფლება; იმ პირებზე, რომლებმაც ვერ გადალახეს მინიმალური კომპეტენციის ზღვარი საგამოცდო ბარათში მითითებულ ყველა გამოცდაში (აღნიშნული არ ეხება ქართულ ენაში მომზადების და აგრეთვე პროფესიულ საგანმანათლებლო პროგრამებს).

უცხო ქვეყნის მოქალაქეზე სახელმწიფო სასწავლო გრანტის გაცემა შესაძლებელია სახელმწიფოს მიერ სასწავლო გრანტისათვის გამოყოფილი თანხის წლიური მოცულობის არა უმეტეს 2%-ის ფარგლებში, საქართველოს განათლებისა და მეცნიერების სამინისტროს მიერ განსაზღვრული სპეციალური სახელმწიფო პროგრამით, საერთაშორისო შეთანხმების საფუძველზე, ან ნაცვალგების პრინციპით.

აკადემიურ უმაღლეს საგანმანათლებლო პროგრამებზე სახელმწიფო სასწავლო გრანტი გაიცემა ყველა გამოცდის (3 სავალდებულო და ერთ-ერთი არჩევითი საგნის) შედეგის მიხედვით. აბიტურიენტმა, რომელიც აბარებს სახელოვნებო პროგრამაზე და სურს სახელმწიფო სასწავლო საგრანტო კონკურსში მონაწილეობის მიღება, აუცილებლად უნდა ჩააბაროს მეოთხე გამოცდა (ნებისმიერი არჩევითი გამოცდების ბლოკიდან).

100 პროცენტიანი დაფინანსება მხოლოდ შემდეგ მიმართულებებზე გაიცემა: სამართალი; ჯანდაცვა; ბიზნესის ადმინისტრირება, გარდა ტურიზმისა; მასობრივი კომუნიკაცია, ჟურნალისტიკა; საერთაშორისო ურთიერთობები; საჯარო მმართველობა.

სახელმწიფო სასწავლო გრანტი მას შემდეგ გაიცემა, რაც საგანმანათლებლო დაწესებულებები, რომლებიც 2012 წელს ახორციელებენ მიღებას პროფესიულ პროგრამებზე, გამოცდების ეროვნულ ცენტრში წარადგენენ ინფორმაციას პროფესიულ პროგრამაზე ჩარიცხული სტუდენტების თაობაზე (15 სექტემბრამდე). მხოლოდ ამის შემდეგ მოხდება პროფესიულ პროგრამებზე სახელმწიფო სასწავლო გრანტის განაწილება.

დაინტერესებულმა პირებმა დამატებითი ინფორმაციის მისაღებად გამოცდების ეროვნული ცენტრის ვებგვერდი www.naec.ge უნდა იხილონ.