გურჯაანის რაიონის სოფელ გურჯაანის საჯარო სკოლიდან დირექტორის მოვალეობის შემსრულებელმა რუსუდან მამულაშვილმა შრომის კოდექსის 37-ე მუხლის I ნაწილის „დ“ ქვეპუნქტის საფუძველზე (შრომითი ხელშეკრულების მოშლა), 23 მასწავლებელი სამსახურიდან გაათავისუფლა.

„მასწავლებელთა გათავისუფლების ძირითადი მიზეზი პედაგოგების მცირე სამუშაო დატვირთვა და ახალი საშტატო განრიგი გახდა. ზოგიერთმა მათგანმა სამსახურიდან გათავისუფლების შესახებ განცხადება თავად დაწერა“ -  განუცხადა კახეთის საინფორმაციო ცენტრს რუსუდან მამულაშვილმა.

გათავისუფლებული მასწავლებლების ნაწილი სკოლის დირექტორის მოვალეობის შემსრულებელს უფლებების დარღვევაში ადანაშაულებს და სამსახურში აღდგენის მოთხოვნით სასამართლოში სარჩელის შეტანას აპირებს. მათი თქმით, შრომითი ხელშეკრულება სკოლასთან 2012 წლამდე ჰქონდათ.

შეგახსენებთ, რომ კახეთში, საჯარო სკოლებიდან პედაგოგების მასობრივი გათავისუფლება აგვისტოში დაიწყო. უფლებადაცვითი ორგანიზაცია „ადამიანის უფლებათა ცენტრის“ მონაცემებით, რეგიონში 500-ზე მეტი მასწავლებელია გათავისუფლებული.