არასამთავრობო ორგანიზაცია „კონსტიტუციის 42-ე მუხლმა“ საჩივრით საქართველოს კომუნიკაციების ეროვნულ კომისიას მიმართა. ორგანიზაცია მოითხოვს გაუქმდეს სატელეფონო კომპანიების გადაწყვეტილება, რომელიც სააბონენტო ნომრებზე 0,20 ლარის დაქვითვას ეხება.

როგორც ცნობილია, მთავრობის 2011 წლის 27 დეკემბრის 489-ე დადგენილების „საქართველოს შინაგან საქმეთა სამინისტროს სსიპ 112-ის მომსახურების საფასური, მისი განაკვეთი და გადახდის წესი“ შესაბამისად, დადგენილია კონკრეტული მომსახურება და მომსახურებისათვის საფასური და განაკვეთები.

„მთავრობის დადგენილების 1-ლი მუხლის მე-4 პუნქტის შესაბამისად საფასური გადაიხდება სააბონენტო ნომერზე, რომელზეც კალენდარული თვის განმავლობაში მოხდა 5 ლარზე მეტი ღირებულების მომსახურების შეძენა ან მომსახურებით სარგებლობა. კონკრეტული მოსარჩელეები, რომლებსაც 112-ის მომსახურებით არ უსარგებლიათ, მიიჩნევენ, რომ სატელეფონო კომპანიის მიერ დაუსაბუთებელი და არასწორია მომსახურების საფასურის 0,20 ლარის ჩამოჭრა. შესაბამისად, „კონსტიტუციის 42-ე მუხლი“ ითხოვს, რომ კომუნიკაციების კომისიამ განიხილოს საჩივარი; გააუქმოს სატელეფონო კომპანიების გადაწყვეტილება 0,20 ლარის დაქვითვის შესახებ; დაავალოს კომპანიებს არასწორად ჩამოჭრილი თანხა ასახოს აბონენტის ბალანსად და მითითებული უკანონო ქმედებისთვის კომპანიებს დაეკისროს შესაბამისი პასუხისმგებლობა“, - აღნიშნულია ორგანიზაციის მიერ გავრცელებულ განცხადებაში.