ეკონომიკისა და მდგრადი განვითარების მინისტრის ვერა ქობალიას განცხადებით, საქართველოში ჩამოსულ უცხოელ ტურისტებს ყველაზე მეტად ფულის დახარჯვა უჭირთ.

„როდესაც ჩვენ ვაკეთებთ გამოკითხვებს, რომ დავადგინოთ რა შენიშვნები ჰქონდათ, რა მოეწონათ, რა არ მოეწონათ ტურისტებს და ა.შ იმისთვის, რომ შემდეგ გავაუმჯობესოთ და განვავითაროთ ჩვენი სერვისები, პირველ ადგილზე არის ის, რომ ვერ შეძლეს ფული დაეხარჯათ საქართველოში. ასე რომ, კერძო სექტორმა ამაზე უნდა იმსჯელოს,“ - განაცხადა ვერა ქობალიამ კახეთის როგორც ტურისტული რეგიონის განვითარების პროექტის პრეზენტაციაზე.

შეგახსენებთ, რომ საქართველოს მთავრობამ 2012 წელი კახეთის ტურისტული განვითარების წლად გამოაცხადა. კახეთის გუბერნატორის გიორგი ღვინიაშვილის თქმით, წელს ინფრასტრუქტურულ სამუშაოებზე ცენტრალური და ადგილობრივი ბიუჯეტიდან 100 მილიონი აშშ დოლარი დაიხარჯება. თელავის, ყვარლის და დართლოს რეაბილიტაციას კი მსოფლიო ბანკი 50 მილიონი აშშ დოლარით დააფინანსებს.

ტურისტული განვითარების პროექტის ფარგლებში ასევე დაგეგმილია კულტურული, სათავგადასავლო და ღვინის ტურიზმის განვითარება. რეგიონში არსებული მნიშვნელოვანი ძეგლების რეაბილიტაცია. გურჯაანის ყველაწმინდის, ძველი და ახალი შუამთის, უჯარმის, ხირსის, დავითის ლავრის, იყალთოს, ნინოწმინდის ტერიტორიაზე ავტოსადგომების, სუვენირების მაღაზიების, საზოგადოებრივ - სანიტარული ობიექტების მოწყობა.

ნათია დანელიშვილი | კახეთის საინფორმაციო ცენტრი