კახეთის მოსახლეობის 70%-ს ელექტროენერგია არ მიეწოდება. როგორც კახეთის საინფორმაციო ცენტრს ს/ს „კახეთის ენერგოდისტრიბუციაში“ განუცხადეს, გუშინ, ღამით, ძლიერი ქარისა და წვიმის შედეგად სხვადასხვა მუნიციპალიტეტებში 40-მდე დაზიანება მოხდა.

„ზოგიერთი დაზიანება უკვე ნაპოვნია, რამდენიმე რაიონში საძიებო სამუშაოები მიმდინარეობს. ელექტროენერგია არ მიეწოდება საგარეჯოს, გურჯაანის, სიღნაღის, ლაგოდეხის და თელავის რაიონების დიდ ნაწილს. ელექტროენერგიის მიწოდების აღდგენის ზუსტი დრო ჯერ-ჯერობით უცნობია“, - განაცხადა „კახეთის ენერგოდისტრიბუციის“ საზოგადოებასთან ურთიერთობის ხელმძღვანელმა ჟანა დიდებაშვილმა.

თელავის მუნიციპალიტეტის გამგებლის მოადგილის დავით ქსოვრელიშვილის განცხადებით, სოფლებში ფშაველსა და ართანაში მაღალი ძაბვის ელექტროენერგიის გადამცემი ანძებია წაქცეული, სოფელ ვანთაში კი ქარმა შარვაშიძეების საცხოვრებელს სახლს სახურავი გადახადა.