ფრაქცია „ქრისტიან - დემოკრატები“ ადმინისტრაციული საპროცესო კოდექსის 34–ე მუხლის არაკონსტიტუციურად ცნობას ითხოვს. ფრაქცია აღნიშნული მუხლის არაკონსტიტუციურად ცნობისათვის კონსტიტუციური სამართალწარმოების დასაწყებად ყველა ბერკეტის გამოყენებას აპირებს.

ფრაქციის თავმჯდომარის მოადგილის, ნიკოლოზ ლალიაშვილის თქმით, ადმინისტრაციული საპროცესო კოდექსის 34–ე მუხლით გათვალისწინებული ნორმა ეწინააღმდეგება საქართველოს კონსტიტუციის მე–6 და მე–7 მუხლებს და იგნორირებას უკეთებს ადამიანის უფლებათა ევროპულ კონვენციას, არ ანიჭებს რა მას უპირატეს იურიდიულ ძალას შიდასახელმწიფოებრივი ნორმატიული აქტების მიმართ. მისივე განმარტებით, „ეს იმას ნიშნავს, რომ იმ შემთხვევაშიც კი, თუ სტრასბურგის ადამიანის უფლებათა და ძირითად თავისუფლებათა სასამართლო უკანონოდ მიიჩნევს საქართველოს სასამართლოს მიერ მიღებულ გადაწყვეტილებას ადმინისტრაციულ საქმეზე, ეს მაინც არ ჩაითვლება საკმარის გარემოებად იმისათვის, რომ მოხდეს გადაწყვეტილების გადახედვა“.

„ადმინისტრაციული საპროცესო კოდექსის 34–ე მუხლი ქვეყანაში მართლმსაჯულების განხოციელებისთვის დამაბრკოლებელი ფაქტორია“, - განაცხადა ლალიაშვილმა.