თელავის რაიონში სოფლები აკურა, ვანთა, ბუშეტი, ქვემო ხოდაშენი, წინანდალი, კისისხევი, ნასამხრალი, შალაური და კონდოლი დაისეტყვა. სოფლებში კისისხევში, კურდღელაურსა და კონდოლში დატბორილია საცხოვრებელი სახლებიც.

როგორც კახეთის საინფორმაციო ცენტრს თელავის მუნიციპალიტეტის გამგებლის მოადგილემ დავით ქსოვრელიშვილმა განუცხადა, სოფელ აკურაში დასეტყვილია მოსავლის 80%, ვანთაში 70%, ბუშეტში 70%, ქვემო ხოდაშენში 50%, წინანდალში 50%, კისისხევში 80%, ნასამხრალში 80%, შალაურში 70% და კონდოლში 15%.

„წუხანდელი სტიქიის შედეგად, სავარაუდოდ, რამდენიმე სოფელში დანგრეულია წყლის სათავე ნაგებობები. ველოდებით წყლის დონის კლებას, რომ დათვალიერება დავიწყოთ. შალაურის მაცხოვრებლებმა გვითხრეს, რომ სოფელში ასეთი წყალდიდობა არასოდეს უნახავთ“, - აღნიშნა ქსოვრელიშვილმა.

რაიონში ზარალის დამთვლელი სპეციალური კომისია მუშაობს. გამგებლის მოადგილის თქმით, ზარალის რაოდენობის დადგენის შემდეგ ინფორმაცია საქართველოს მთავრობას გაეგზავნება.