სარეზერვო სამსახური 40 წლამდე მამაკაცებისთვის კვლავ სავალდებულო იქნება, სამსახურის 18 დღიანი ვადა კი 45 დღემდე გაიზრდება. აღნიშნულ საკითხს „სამხედრო სარეზერვო სამსახურის“ შესახებ კანონპროექტი ითვალისწინებს, რომელიც პარლამენტის ბიუროს სხდომაზე იყო ინიცირებული.

როგორც მისი ერთ-ერთი ავტორი თავდაცვისა და უშშროების საპარლამენტო კომიტეტის თავმჯდომარის მოადგილე სამსონ ქუთათელაძე განმარტავს, თავდაპირველად სარეზერვო სამსახური სავალდებულო იყო, თუმცა შემდეგ განხორციელებული საკანონმდებლო ცვლილებით, რეზერვის გავლა ნებაყოფლობითი გახდა.

ახალი საკანონმდებლო ცვლილებით კი, სარეზერვო სამსახური კვლავ სავალდებულო ხდება, სარეზერვო სამსახურში 18 დღიანი მსახურის ვადა კი, 45 დღემდე იზრდება.

„ინტერპრესნიუსის“ ცნობით, კანონპროექტი ასევე განსაზღვრავს სამხედრო ძალების რეზერვის კატეგორიებს, რეზერვის ფორმირების, ორგანიზების და გავლის საფუძვლებს. გარდა ამისა, კანონპროექტით, სამხედრო სარეზერვო სამსახურში მყოფ პირს, სამხედრო მოსამსახურის სტატუსი ექნება. კანონპროექტის ავტორები დეპუტატები სამსონ ქუთათელაძე, ლაშა თორდია და ზვიად კუკავა არიან.