შინაგან საქმეთა სამინისტრომ სოფო ნიკოლაშვილის დაკავებასთან დაკავშირებით ინფორმაცია გაავრცელა. შსს-ს ცნობით, დაკავებულია მკვლელობის მცდელობისთვის ბრალდებული, რომელიც აღიარებს მის მიერ ჩადენილ დანაშაულს.

„შინაგან საქმეთა სამინისტროს კახეთის სამხარეო მთავარი სამმართველოს თანამშრომლებმა დააკავეს სოფიო დავითის ასული ნიკოლაშვილი, რომელიც ბრალდებულია საქართველოს სსკ-ის 19, 108 და 236 მუხლებით. (მკვლელობის მცდელობა, იარაღის უკანონო ტარება)“, - აღნიშნულია შინაგან საქმეთა სამინისტროს ვებგვერდზე გამოქვეყნებულ განცხადებაში.

როგორც ცნობილია, ინციდენტი გუშინ, საღამოს ქალაქ გურჯაანში, ვაჟა ფშაველას ქუჩაზე მოხდა. სამართალდამცავების ცნობით, სოფო ნიკოლაშვილი შეეცადა 21 წლის გიორგი სიბაშვილისთვის მამამისის კუთვნილი ცეცხლსასროლი იარაღიდან ესროლა, თუმცა სიბაშვილმა მას იარაღი წაართვა. პოლიციაში აცხადებენ, რომ სოფო ნიკოლაშვილს გიორგი სიბაშვილი უყვარდა. სოფო ნიკოლაშვილი თელავის წინასწარი დაკავების იზოლატორშია მოთავსებული. კახეთის საოლქო პროკურატურის ინფორმაციით, გამოძიება 19/108 მუხლით მიმდინარეობს. დანაშაულის დამტკიცების შემთხვევაში 20 წლის სოფო ნიკოლაშვილს 7-დან 15 წლამდე თავისუფლების აღკვეთა ემუქრება.