ახალი სასწავლო წლიდან საჯარო სკოლების პედაგოგებს ხელფასიდან ყოველთვიურად 3 ლარს აჭრიან. სკოლის დირექტორებმა მასწავლებლებს „ჯეოსელის“ სიმბარათები დაურიგეს. იმის მიუხედავად გამოიყენებს თუ არა პედაგოგი „ჯეოსელის“ ნომერს, იგი ვალდებულია ნომერი კორპორატიულ რეჟიმში იყოს ჩართული და ყოველთვიური გადასახადი გადაიხადოს.

ამის გამო „ქართული პარტია“ განათლებისა და მეცნიერების მინისტრს დიმიტრი შაშკინს პედაგოგების უფლებების დარღვევაში და სახელმწიფო მონოპოლიის მხარდაჭერაში ადანაშაულებს.

„განათლების სამინისტრო და მისი ხელმძღვანელი დიმიტრი შაშკინი სახელმწიფო მონოპოლიაშია ჩართული. სასწავლო წლის დასაწყისში საჯარო სკოლების დირექტორებმა სამინისტროდან მიიღეს დავალება, რომ უკლებლივ ყველა პედაგოგი „ჯეოსელის“ აბონენტი განხდარიყო. სამინისტროდან საჯარო სკოლებში გაგზავნილი დირექტივა ზეპირსიტყვიერია და მისი კანონიერება მეტად საეჭვოა. საქართველოში, „ჯეოსელის გარდა“ კიდევ ორი ფიჭური კავშირგაბმულობის კომპანია ფუნქციონირებს, მაგრამ სამინისტრომ ყოველგვარი ტენდერის გარეშე უპირატესობა „ჯეოსელს“ მიანიჭა და ამ ნაბიჯის საჭიროება პედაგოგებს შორის კომუნიკაციის გამარტივების აუცილებლობით ახსნა“, - განაცხადა ირაკლი კორძაიამ.