თელავში, „ყამბარაშვილის კლინიკაში“ გარდაცვლილი 22 წლის ხათირა უქანოვას ახლობლები საქართველოს შრომის, ჯანმრთელობისა და სოციალური დაცვის მინისტრთან ზურაბ ჭიაბერაშვილთან შეხვედრას ითხოვენ. წინააღმდეგ შემთხვევაში გარდაცვლილის ოჯახის წევრები სამინისტროსთან საპროტესტო აქციის გამართვას აპირებენ.

„სამინისტროში ვართ ახლა. სამედიცინო საქმიანობის რეგულირების სააგენტოს უფროსთან გვინდოდა შეხვედრა, მაგრამ არ გვიშვებენ. ამიტომ, ჯანდაცვის მინისტრთან ვითხოვთ შეხვედრას. როგორ, რაც მოგვთხოვეს კლინიკაში, ფული გადავიხადეთ, ჯანმრთელი გოგო მივიყვანეთ და დაიღუპა. ამაზე პასუხი არავინ არ უნდა აგოს? განა პირველი შემთხვევაა. მაგ კლინიკაში სიკვდილიანობა მაღალია“. – განუცხადა კახეთის საინფორმაციო ცენტრს გარდაცვლილის ახლობელმა გულნარა მახაროვამ.

თელავის სამშობიარო სახლში 22 წლის ხათირა უქანოვა 6 ივლისს, დილით გარდაიცვალა. ფაქტზე აღძრულია სისხლის სამართლის საქმე. გამოძიებას შს კახეთის სამხარეო მთავარი სამმართველო აწარმოებს.